“Theatre of the day” në bashkëpunim me Teatrin Kombëtar dhe Cirkun Kombëtar do të prezantojnë në datën 10 – 11 Dhjetor  shfaqjen “Qejfharami” me autor dhe regji nga Armand Bora. Kjo shfaqje teatrore është ndërtuar duke u mbështetur mbi parimet e Teatrit Polifonik. Ky teatër dallon për mënyrën se si aktori përdor trupin e tij, xhestet dhe lëvizjet skenike.

Drama satirike “Qejfharami” është një ritrajtim modern i mitit të Edipit. Personazhi i Edipit është çmitizuar dhe është vendosur në situata dhe rrethana që zbulojnë anë komike dhe groteske të tij. Historia e këtij Edipi mbivendoset me situata dhe rrethana që kanë jetuar personazhe të tjerë të rëndësishëm në historinë e njerëzimit. Portretet e perandorit Kaligula, Makbethit, Stalinit apo e dictatorëve të tjerë  modernë bashkohen bashkë për të sjellë në një polifoni ngjyrash dhe tingujsh, portretin e vërtetë të një pushtetari.  Në dramë ka edhe një linjë lirike ku marrdhënija midis Djalit dhe Vajzës në prag të martesës merr një kthesë dramatike si rrjedhojë e vendosjes së ligjit të Qejfharamit. Sipas këtij ligji, në një situate kur të gjithë meshkujt janë të infektuar nga murtaja e kuqe, detyrohet çdo femër e martuar që fëmijët t’i bëj me mbretin Edip si i vetmi mashkull i pastër dhe i pa prekur nga murtaja. Për të bërë të mundur ndalimin e këtij ligji, Djali vendos të hyjë në guvën e Qorrit duke lexuar sekretet e Tebës dhe duke zbuluar prejardhjen e infektuar të mbretit Edip. Pas leximit të sekreteve Djali humbet shikimin dhe i verbër  i rrëfen të vërtetën Edipit duke i kërkuar largimin nga pushteti. Teksti  tenton të shpjegojë dhe t’u japë përgjigje disa prej problemeve që vuajnë shoqëritë postdiktatoriale. Shfaqja është punuar dhe do të prezantohet për publikun në arenën e Cirkut Kombëtar.

Një element tjetër që e bën të veçantë këtë produksion është edhe vendimi për të dhuruar një pjesë nga të ardhurat e shitjes së biletave në ndihmë të disa familjeve në nevojë duke bashkëpunuar dhe bashkëvepruar me organizata dhe shoqata që veprojnë në këtë fushë.

Kostumet e realizuara nga Anila Zajmi Katanolli janë të konceptuara mbi të njëjtat parime estetike dhe filozofike që është ndërtuar shfaqja.

Për realizimin e shfaqjes është punuar duke u ushtruar me teknikat e arteve marciale dhe teknika të artit të cirkut. Përdorimi i maskave dhe kukullës i jep shfaqjes, njëkohësisht edhe dimensionin antik dhe atë modern. Edhe përdorimi i imazheve filmike vjen si rezultat i nevojës për të theksuar pikat e takimit të personazheve të veprës me personazhe të tjerë artistik apo historik.

Në rolin e Edipit është Aleks Seitaj,

Në rolin e Djalit është Edvin Mustafa

Në rolin e Shefit është Shegushe Bebeti

Në rolin e Shitësit është Suela Bako

Në rolin e Oborrtarit ësht Anila Muçaj

Në rolin e Vajzës është Jorida Meta

Në rolin e Nënës mbretëreshe ështe Rexhina Mollaymeri

Formulimi muzikor : Sokol Marsi

Lëvizja skenike: Fatjon Sulstarova

Mjeshtër i artit marcial: Shihan Enver Cakiqi

Mjeshtër i cirkut: Kujtim Dumi

Maskat janë realizuar nga Merita Spahiu.