Filmi i metrazhit të shkurtër ‘Përjetësisht Fëmijë’, me skenar e regji të Lorena Sopit, prodhim i AS Film Production dhe Fakultetit të Arteve, është përzgjedhur të jetë pjesë e programeve zyrtare të shtatë festivaleve të ndryshme ndërkombëtare.

Kurse gjatë muajit qershor dhe korrik, filmi ‘Përjetësisht Fëmijë’, do të jetë pjesë e programit zyrtar të festivalit të njohur Sunlight International Film Festival , i cili do të mbahet në Teatrin Olimpik në Moskë të Rusisë, për të vazhduar në festivalin prestigjioz Regina International Film Festival, i cili do të mbahet në Pedreson Crescent të Kanadasë.

Filmi ‘Përjetësisht Fëmijë’ trajton raportin e rrënuar familjar mes babait autoritar dhe fëmisë të mitur.

Moni, një djalë dhjetë vjeçar, jeton me të atin Xhemën në varfëri të madhe. Gjatë një dreke fatale, i ati Xhema vret aksidentalisht djalin e tij, Monin. Gjithë jetën e tij, Xhema do të ndjejë peshën e mallkimit, duke bartur mbi vete fajin për atë që ka ndodhur. Në ditët e tij të fundit, në moshë të shtyrë, Xhema kthehet në shtëpinë ku ka ndodhur vrasja për të kërkuar falje nga djali i tij i vdekur, me shpresë se do të liroj shpirtin nga pesha e fajit dhe do të pushoj i qetë në jetën e përtejme.

Në rolin kryesor paraqitet aktori i njohur Xhevat Qorraj dhe Miran Zymberaj. Në rolet e tjera vijnë Sheqerije Buqaj, Beslidhje Bytyqi, Kosovare Hoti, Joni Thimi, etj.

Ky është filmi i dytë i shkurtër i Lorena Sopit. Vlen të përmendet se filmi i parë i shkurtër ‘Mona’ i regjisores Sopi, ka qenë pjesë e mbi 50 festivaleve ndërkombëtare dhe ka fituar 8 çmime të ndryshme. /ATA/