Artisti Viktor Ferraj prezantohet në Galerine Kalo me ekspozitën “Habitat”, ku sjell në mënyrë tepër të veçantë, nëpërmjet gërshetimit të ndjesisë së tij artistike me teknikën e fituar dhe perfeksionuar në Itali, Savona, detaje të jetës në komunitet e fqinjësi.

Në fytyrat e personazheve që artisti ka krijuar dallohet trishtim, brengë. Artisti nuk merr përsipër të na thotë shkakun e brengosjes; nëse nga vështirësitë e jetës, pabarazia mes banorëve, mungesa e furnizimit me ujë a energji, apo nga mjetet e pamjaftueshme për të përballuar koston e një jete me kushte të pranueshme.

Por, nga ana tjetër, në formë antiteze, ai na paraqet në shumicën e tablove një farë fryme mobilizimi, entuziazmi, që edhe pse nuk reflektohet tek sytë, apo tiparet e personazheve, shfaqet nëpërmjet lëvizjes në grup, përpjekjeve për organizim e koordinim, madje në disa prej tyre përfshihet kali, ndofta për shkak të simbolit të tij si përcaktues i fitoreve në betejat që kanë shoqëruar historinë njerëzore.

Artisti përdor edhe simbole të tjera si lavjerrësi, tuneli, mjete transporti primitive, etj. Këtë e bën për të treguar edhe karakteristikën e mjedisit – shumëllojshmërinë. Shumëllojshmëri në karakteret njerëzore, por edhe në atë të objekteve, saqë ekspozitës mund t’i përshtatej fare mirë edhe titulli “Shumëllojshmëri”. Ekspozita do jetë e hapuar nga 15-30 qershor 2017, Galeria Kalo, Tiranë.