Me fillimin e muajit qershorit, në kuadër të masave lehtësuese të ndërmarra nga qeveria, pas izolimit të diktuar nga ekspertët e shëndetësisë për parandalimin e përhapjes së COVID-19 pritet të rinisë nga puna dhe transporti urban dhe ndërurban, nën masa të mirëpërcaktuara të higjienës dhe distancimit social.
Kreu i Shoqatës së Transportit ndërqytetës, Kujtim Mema, gjatë një prononcimi ka bërë të ditur se fillimisht është menduar data 9 qershor për rihapjen e transportit publik, teksa po diskutohen modalitetet dhe protokollet që duhen ndjekur.
“Ende nuk kemi një datë zyrtare, këtë e vendosin ekspertët e shëndetësisë, por paraprakisht është menduar data 9 qershor. Flota e autobusëve ndërqytetës është gati, pas mbylljes tremujore. Me mbylljen e këtij shërbimi në muajin mars, nisi dhe dezinfektimi i tyre. Sa i takon masave kjo është çështje e ekspertëve. Ne kemi zhvilluar takime me strukturat shtetërore, ministrinë, DPSHTRR, ku kemi dhënë sugjerimet tona. Në bazë të asaj çka ka ndodhur në vendet e tjera, për të garantuar distancimin social pritet të kemi lëvizje të automjeteve me gjysmën e kapacitetit, sediljet një po një jo, me maska dhe doreza”,- tha Mema.
Ai shtoi se kjo do të sjellë dhe reflektim në kosto. “Natyrisht masat që do të merren do të kenë dhe rritje të kostos. Autobusi do të niset i dezinfektuar me gjysmën e kapacitetit dhe kur të mbërrijë në destinacion sërish do dezinfektohet, për të realizuar rrugën e kthimit. Kemi diskutuar me strukturat shtetërore me organet përkatëse ku na është thënë se do gjenden mekanizma për të parandaluar dëmet që do krijohen nga këto masa. Jo më vonë se dje apo pardje është bërë një mbledhje për mënyrën se si do realizohet ky transport, pa dëmtuar operatorët dhe qytetarin”,- tha Mema.
“Heqja e taksës vjetore për transportin për mjetet mbi 8+1, për këtë vit, për shkak të situatës së krijuar nga COVID 19, është një ndihmë e madhe e marrë nga Blendi Gonxhe, drejtor i Drejtorisë së Përgjithshme të Shfrytëzimit të Transportit Rrugor për të cilin jemi mirënjohës”,- theksoi Mema.
Rixhin Qoshja, kreu i Shoqatës Kombëtare të Transportit Urban, gjatë një prononcimi për ATSH, shprehet se po bëhen disa përshtatje bazuar në modelet europiane se si do bëhet transporti. “Prej 11 marsit ky shërbim është i mbyllur. Kemi bërë dezinfektimin e plotë të autobusëve si dhe larjen e tyre. Të gjithë përdoruesit e transportit publik kërkojnë me padurim rifillimin e këtij shërbimi. Ne duhet të aplikojmë standardet që aplikojnë vendet e tjera për-rreth nesh”,- tha Qoshja.
“Jemi duke bërë disa adaptime bazuar në modelet që janë bërë në Europë për të kuptuar kapacitetin e pasagjerëve që mund të transportojmë. Me disa manipulime që kemi bërë duke u bazuar në modelin italian apo atë të Prishtinës, atëherë ne s’mund të kemi më shumë se 30 pasagjerë, pra 30% të kapacitetit, një ulëse po një ulëse jo, rregullat standarde për maskat dhe dorezat”,- tha Qoshja.
“Ne kemi dhënë disa mendime tona, kemi dhënë sugjerimet tona, por ende s’kemi diçka konkrete dhe jemi ende në pritje të protokollit final. Në lidhje me fatorinon, ky është problem sepse s’mund të respektojmë distancën e sigurisë me fatorinon. Kjo mbetet për t’u zgjidhur nga autoritetet përkatëse”, u shpreh ai.
Qoshja tha se “Drejtoria e Përgjithshme e Shfrytëzimit të Transportit Rrugor, e drejtuar nga Gonxhe ka suportuar kompanitë e transportit, ka rimbursuar të gjitha taksat e këtij viti për automjetet për transportin e pasagjerëve. Është një ndihmë jo e vogël për ne, në një situatë që është kthyer e vështirë për operatorët e transportit urban”,- përfundoi Qoshja.
ATA
