Pasditen e kësaj të marte grupimi më i madh politik CDU/CSU ka votuar për hapjen e bisedimeve për anëtarësimin e Shqipërisë me Bashkimin Europian.
CDU/CSU ka votuar kështu draftin e dokumentit që do të votojë të enjten Bundestagu gjerman.
“Bundestagu gjerman i hap dritën jeshile Qeverisë Federale që të mbështesë vendimin e Këshillit Europian për hapjen e negociatave të anëtarësimit në BE me Shqipërinë. Në të njëjtën kohë, ai shpreson që një vendim i mëvonshëm për anëtarësimin në BE jo vetëm që do të rregullonte përmbushjen e kritereve të anëtarësimit, por edhe do të merrte në konsideratë aftësinë përthithëse të BE-së”, thuhet në rezolutën e CDU/CSU-së.
“Bundestagu gjerman u bën thirrje forcave demokratike në Shqipëri të bëjnë përpjekje të menjëhershme për kapërcimin sa më të shpejtë të krizës përmes dialogut politik, përndryshe rruga e negociatave të anëtarësimit do të bëhet edhe më e vështirë”, thuhet në rezolutë.
“Që në qershor të vitit 2018, Këshilli u angazhua të merrte një vendim për hapjen e bisedimeve të anëtarësimit në vitin 2019 në bazë të progresit të deritanishëm dhe përmbushjen e kritereve të sipërpërmendura. Që atëherë, Shqipëria ka vazhduar kursin e zbatimit të reformave dhe ka bërë progres në përmbushjen e kritereve kryesore. Përveç njohjes së progresit të reformave, Komisioni bën gjithashtu thirrje për përmirësimin e klimës politike në vend”, thuhet në rezolutë.
“Bundestagu gjerman mbështet anëtarësimin e Shqipërisë në Bashkimin Europian dhe njeh përpjekjet e vendit për realizimin e reformave. Procesi i anëtarësimit është nxitës kryesor për reforma dhe stabilitet në rajon. Gjermania dhe BE-ja janë veçanërisht të interesuara për stabilizimin dhe bashkëpunimin e fqinjësisë së mirë në rajon. Shqipëria i kushton përparësi absolute anëtarësimit në BE dhe mbështetja popullore në këtë vend anëtar të NATO-s për anëtarësim në BE është shumë e lartë. Në vitet e fundit, vendi ka ndërmarrë reforma politike thelbësore për përmbushjen e kushteve për hapjen e negociatave të anëtarësimit. Zbatimi i një reforme tërësore në sistemin e drejtësisë vazhdon”, vijon raporti.
Dokumenti ka 9 pika të kërkesave ndaj Shqipërisë të cilat ndahen në dy blloqe. Në bllokun prioritar janë reforma zgjedhore, ngritja e Gjykatës së Lartë dhe Kushtetuese ndërsa gjashtë pikat e tjera hyjnë në bllokun e dytë të cilat duhet të plotësohen kur të hapen negociatat.
Kërkesat kryesisht lidhen me drejtësinë dhe ndërtimin e institucioneve që do luftojnë korrupsionin dhe krimin e organizuar.
ATA
