Të punësosh punonjës të kualifikuar në Shqipëri kushton më pak se në vendet e tjera të Ballkanit. Ky është faktori me të cilin Shqipëria konkurron vendet e rajonit në tërheqjen e investimeve të huaja, pasi taksat dhe tatimet janë në nivele të larta dhe të pafavorshme për bizneset e huaja.

Paga minimale në Shqipëri është 157 euro, më e ulëta në rajon, pasi Maqedonia ka një page minimale prej 200 eurosh, Serbia 226 euro, Kosova 170 euro, Bosnja 164 euro dhe Mali i Zi ka pagën minimale më të lartë 288 euro.

Shqipëria gjithashtu është vendi me pagën më të ulët mesatare në rajon me vlerë 357 euro. Ndërsa Mali i Zi ka pagën mesatare më të lartë në rajon 739 euro. Vendet e tjera të rajonit variojnë në vlerat: Maqedonia 530 euro, Serbia 500 euro, Kosova 360 euro dhe Bosnja 424 euro.

Shifrat tregojnë se kostoja e punonjësve në vendin tonë është më e ulët se në vendet e rajonit, gjë që është në interes të investitorëve të huaj. Megjithatëe në Shqipëri mungon fuqia punëtore e kualifikuar dhe certifikuar për detyra të ndryshme në fushën e industrisë (naftë, gaz, TAP etj.) dhe teknologjisë.