Ka përfunduar mbrëmjen e kësaj të mërkure në Bruksel raundi i 30-të i bisedimeve të nivelit të lartë mes Kosovës dhe Serbisë, të ndërmjetësuar nga Bashkimi Evropian.
Bisedimet janë zhvilluar në praninë e dy kryeministrave, Isa Mustafa dhe Aleksandar Vuçiç, si dhe të Përfaqësueses së Lartë, Federica Mogherini.
Në përfundim të takimit, kryeministri Mustafa ka bërë të ditur se, me Serbinë nuk ka ende një marrëveshje konkrete për Asociacionin e Komunave Serbe.

“Asgjë nuk zbatohet nëse nuk është në përputhje me Kushtetutën e Kosovës”, ka thënë Mustafa.

Ndërsa nga delegacioni serb, Marko Gjuriç ka thënë se, pavarësisht Kushtetutës kosovare, Serbia nuk e njeh atë zyrtarisht.
Ky ishte takimi i parë për vitin 2016, që nisi me traditën e takimeve të veçanta mes Mogherinit dhe dy kryeministrave dhe më pas vijoi me atë trepalësh.