Antibiotikët janë të rëndësishëm dhe në shumicën e rasteve shërbejnë për kurim, por ndodh që përdorimi i tepërt mund ta çojnë në rrezik shëndetin.

Sipas një studimi të ri, përdorimi i antibiotikëve çon edhe në shtimin e peshës.

Studiuesit nga “Johns Hopkins Bloomberg” kanë gjetur se fëmijët që përdorin rregullisht antibiotikë gjatë fëmijërisë së tyre fitojnë peshë më shpejtë se ata që nuk përdorin, raporton “International Journal of Obesity”.

Dr. Brian Schwartz, profesor në shkollën “Bloomberg” dhe ekipi i tij kanë analizuar të dhënat nga më shumë se 160 mijë fëmijë në mes moshës 3 dhe 18 vjeçare. Ata kanë grumbulluar të dhënat e peshës dhe shtimit të peshës për të vendosur indeksin e peshës si dhe përdorimin e antibiotikëve duke krahasuar vit pas viti.

Rezultatet treguan se në moshën 15-vjeçare, fëmijët që kishin marrë antibiotike shtatë ose më shumë herë gjatë fëmijërisë së tyre peshonin 1.5 kilogramë më shumë se ata që s’kanë marrë antibiotikë kurrë. Rreth 21 % e pjesëmarrësve, 30 mijë, kanë marrë antibiotikë shtatë ose më shumë herë gjatë fëmijërisë.

Schwartz thotë se këto gjetje nënkuptojnë që shëndoshja vjen si pasojë e përdorimit të antibiotike dhe ajo ndryshon varësisht se sa të fortë janë antibiotikët.

Shkencëtarët për këtë kishin njoftuar edhe më parë duke u bazuar në testimet e bëra në kafshë. Sipas studiuesve, arsye për këtë është se antibiotikët ndikojnë në disa mikroorganizma që jetojnë në trupi e njeriut.

Në fund, shkencëtarët thonë se kjo nuk nënkupton që antibiotikët të mos përdoren, por vetëm se krijuesit e ilaçit duhet të jenë më të saktë në përshkrimin e ilaçit që krijojnë.