Vdiq në Romë në moshën 84 vjeçare aktori Paolo Villaggio. Ishte shtruar prej disa ditësh në një klinikë private në Romë.
Me origjinë nga Xhenova, Villagio ishte shkrimtar , autor dhe aktor, protagonist i një sezoni historik, mes ekranit të madh, radios dhe televizionit. Ka interpretuar mijëra personazhe, i pari nga të gjithë Ugo Fantozzi.
“Lamtumirë baba, tani je përsëri i lirë të fluturosh”, me një postim në rrjetin social Facebook, pak fjalë dhe një zemër, Elisabetta Villaggio përshëndet babain e saj.
Mesazhi është shoqëruar nga një foto bardhë e zi, të Paolo Villaggio bashkë me fëmijët e tij. Aktori kishte përfunduar prej pak kohësh të xhironte “Zërin e Fantozzit”, të Mario Sesti, me producent Daniele Liburdi dhe Massimo Mescia.
“Kujtoj Paolo Villaggio. Talent komik i jashtëzakonshëm”, shkruan kryeministri italian Paolo Gentiloni në Twitter.
I lindur në 30 dhjetor të 1932 Paolo Villagio ishte aktor televiziv dhe kinematografik në zhanrin e komedisë, si profesori Kranz dhe i ndrojturi Giandomenico Fracchia, llogaritari Ugo Fantozzi.