Temperaturat e larta të ditëve të fundit bëjnë të domosdoshme përsëritjen e këshillave për t’u ruajtur nga i nxehti dhe për t’u ushqyer në mënyrë sa më të shëndetshme. Mjekët këshillojnë shmangien e qëndrimit në diell gjatë ditës dhe mbajtjen e një diete ushqimore të kujdesshme. Më poshtë po japim disa nga porositë e tyre.

1. Shmangni daljet në orët e pikut 11:00 – 17:00, veçanërisht fëmijët, të moshuarit dhe të sëmurët kronikë.
2. Shmangni ekspozimin e drejtpërdrejtë në diell përmes përdorimit të kapeles, rrobave të lehta dhe kremërat mbrojtës.
3. Konsumoni ujë dhe lëngje dhe mos konsumoni pije alkoolike.
4. Ajrosni ambientet e brendshme në mëngjes dhe mbrëmje.
5. Rregulloni temperaturën e zyrave dhe mjediseve të punës në mënyrë që të shmangni nxehtësinë e madhe.
6. Nuk duhet të ketë diferencë të madhe mes temperaturës së ambientit brenda me atë jashtë.
7. Konsumoni fruta dhe zarzavate të freskëta, sallatë dhe perime të ziera.
8. Shmangni ushqimet e rënda me yndyrna dhe shumë kalori.