Kryeministri Edi Rama njoftoi në mbledhjen e jashtëzakonshme të qeverisë ndërprerjen e fluturimeve me “zonat e kuqe” prej koronavirusit në Shqipëri.

Më pak se një orë nga fjala e kreut të ekzekutivit, Autoriteti Aviacionit Civil ka vënë në zbatim urdhrin e qeverisë.

Në vijim të situatës së krijuar në Itali për shkak të përhapjes së COVID-19, masave të marra nga qeveria italiane për vendosjen e karantinës në veri të Italisë, si dhe masave parandaluese të përhapjes së virusit në vendin tonë, në zbatim të urdhrit të Ministrisë së Infrastrukturës dhe Energjisë, ndalohen të gjitha fluturimet për dhe nga Aeroporti Ndërkombëtar “Nënë Tereza” drejt 10 aeroporteve të Italisë:

– Aeroporti Milano Malpensa (MXP)

– Aeroporti Milano Bergamo (BGY)

– Aeroporti Bologna (BLQ)

– Aeroporti Firenze (FLR)

– Aeroporti Genoa (GOA)

– Aeroporti Perugia (PEG)

– Aeroporti Pisa (PSA)

– Aeroporti Rimini (RMI)

– Aeroporti Venezia (VCE)

– Aeroporti Verona (VRN)

Autoriteti Aviacionit Civil ka lëshuar menjëherë udhëzimin drejtuar Aeroportit Ndërkombëtar “Nënë Tereza” dhe ofruesit të shërbimit të lundrimit ajror “Albcontrol” për nxjerrjen e njoftimeve të nevojshme për zbatimin e këtij kufizim.