Njihni shkaktarët që krijojnë probleme me kujtesën

Shpesh mund t’ju ketë ndodhur të keni harruar telefonin në shtëpi, çelësat e makinës, ose ndonjë dokument të rëndësishëm. Kjo është një nga format më të përhapura të harresës, e cila nuk ka asgjë për tu shqetësuar. Ajo që duhet të keni kujdes  është kur vini re se herë pas here ndiheni konfuzë dhe keni boshllëqe në kujtesë. Më poshtë do t’ju njohim me pesë arsyet e pabesueshme përse keni humbje të kujtesës.
1. Medikamentet e ndryshme: Sipas Agjencisë Amerikane të Ushqimit dhe Medikamenteve (FDA), përdorimi i ilaçeve të caktuara ka efekte anësore në organizëm, duke filluar nga përzierjet dhe diarreja deri tek marramendja, depresioni dhe humbja e kujtesës. Në këto ilaçe mund të përmendin statinët, grup ilaçesh që ul nivelin e yndyrës në gjak.
2. Mungesa e vitaminës B12: Vitamina B12 është veçanërisht e rëndësishme pasi ndihmon qelizat nervore të jenë të shëndetshme dhe ndihmon në prodhimin e ADN-së dhe ARN-së. Nivelet e ulëta të vitaminës B12 në organizëm sjell nga pas një sërë simptomash si: lodhje, probleme me frymëmarrjen, diarre, nervozizëm, mpirje, ndjesi shpimi dhe humbje të kujtesës.
3. Apnea e gjumit: Apnea e gjumit është një çrregullim serioz i gjumit, i cili shkaktohet prej bllokimit të frymëmarrjes gjatë tij duke e ekspozuar organizmin ndaj një gjendjeje mungese të vazhdueshme oksigjeni. Bllokimet e frymëmarrjes mund të zgjasin nga disa sekonda në disa minuta dhe përsëriten në një cikël deri në 30 ose më shumë herë brenda një ore. Sipas The National Sleep Foundation, apnea e gjumit mund të krijojë humbje të përkohshme të kujtesës.
4. Goditja cerebrale: Goditja cerebrale ka një impakt të menjëhershëm në sistemin nervor qendror. Dëmet e shkaktuara nga kjo goditje (iktus) çojnë në probleme të kujtesës që mund të bëhen më të rënda me kalimin e kohës.
5. Depresioni dhe ankthi: Sipas studimeve të ndryshme, ankthi dhe depresioni dëmtojnë aftësinë e trurit për të ruajtur kujtime afatgjata. Dikush që është në depresion është në përgjithësi i pavëmendshëm dhe i paaftë për të kujtuar rendin kronologjik të ngjarjeve. Burime të tjera të humbjes së kujtesës janë infeksionet, dëmtimet në kokë, tumori në tru dhe abuzimi me substancat narkotike.

Burimi: Living

 

Pin It