Shoqata Shqiptare e Turizmit (ATA) nuk është e kënaqur me gjendjen në të cilën ndodhet vendi edhe këtë sezon veror. Në një deklaratë për shtyp kjo shoqatë rendit disa nga problemet kryesore që sipas saj po pengojnë zhvillimin e turizmit në vend.
Në deklaratë thuhet se Shqipëria vijon të përjetojë problem me ndërprerjen e energjisë elektrike, ndërtimet gjatë sezonit turistik, mungesën e infrastrukturës dhe politikave për tërheqjen e turistëve. Ndërsa vendet fqinje si Mali i Zi, Maqedonia dhe Serbia po zbatojnë politika të reja për tërheqjen e turistëve, kërkesa e të cilëve po zhvendoset drejt Ballkanit Perëndimor.
Këto vende ofrojnë subvencione për turistët, fluturime me kosto më të ulët dhe aktivitete të shumta. Ndërsa sipas ATA-s Shqipëria këtë sezon turistik e nis me energji 48% më të shtrenjtë se fqinjët dhe rikonstruksione të rrjetit që shkaktojnë rreth 12 orë ndërprerje të energjisë në ditë.
Por sipas Shoqatës Shqiptare të Turizmit, ky nuk është problem i vetëm. Ajo ka përgatitur një listë me problemet si më poshtë:
- Ndërprerje energjie
- Rritje të cmimit të energjisë në mënyrë abuzive kjo e konfirmuar edhe nga ERE
- Luhatje tensioni dhe dëmtim pajisjesh në të gjithë vendin
- Qytetet kryesore bregdetare të kthyera dhe mbetura në kantierë ndertimi
- Plehra dhe papastërti
- Akset rrugore që furnizojnë zona strategjike bregdetare më të ngushta se shëtitoret e këmbësoreve buzë detit
- Situata të paqarta për administrimin e plazheve
Vatra insektesh dhe sëmundjesh dhe kafshë rrugësh në shumicën e rasteve të pavaksinuara.