“Të komunikojmë që të njihemi” ishte tema e aktivitetit të zhvilluar nga Medreseja e Tiranës me rastin e 15-vjetorit të Ditës Evropiane të Gjuhëve të Huaja. Programi artistik i organizuar me këtë rast synonte njohjen e rëndësisë së gjuhëve në shkëmbimin kulturor dhe ndërtimin e një shoqërie, ku njerëzit njihen dhe krijojnë miqësi.

Drejtori i Medresesë së Tiranës, Ali Zaimi, theksoi rolin e mësimit të gjuhëve të huaja në zgjerimin e botës në të cilën jetojmë.

“Mësimi i gjuhëve të huaja bën të mundur shkëmbimin e kulturave të reja, zgjerimin e horizonteve dhe njohjes me individë të ndryshëm nga shoqëri të ndryshme”, u shpreh Zaimi.

Aktiviteti u përshëndet edhe kancelari i KMSH-së, Ylli Cikalleshi, i cili e vlerësoi Medresenë e Tiranës si shembull të mirë të orientimit të nxënësve drejt mësimit të gjuhëve të huaja. Ai tha se KMSH ndihet krenare për ecurinë e kësaj shkolle që iu ofron nxënësve mundësitë për një të ardhme më të mirë.

“Komuniteti Mysliman i Shqipërisë është mjaft krenar për ecurinë e Medresesë së Tiranës. Të gjithë nxënësit e kësaj shkolle kanë mundësitë më të mira të përparojnë në nxënien e gjuhëve të huaja, të cilat do të shërbejnë për një të ardhme më të mirë”, tha z. Cikalleshi.

Programi i organizuar nga nxënësit dhe mësuesit përmbante pjesë teatrale, muzikë, poezi, kuriozitete në disa gjuhë të huaja.

Medreseja e Tiranës ofron mësimdhënie të gjuhës angleze, turke dhe arabe për përvetësimin sa më të mirë të të cilave organizohen rregullisht programe artistike dhe aktivitete të llojeve të ndryshme.