“Vajzat e Mjegullës” të Namik Dokles janë kthyer në atdhe. Pas një  rrugëtimi letrar nëpër Ballkan, kKK Instituti i Librit dhe i Promocionit, në bashkëpunim me Botimet Toena, promovuan dje romanin e shkrimtarit dhe deputetit në mjediset universitare të kryeqytetit, me pjesëmarrje të studentëve, pedagogëve e miqve të librit.

Për romanin janë shprehur në media të ndryshme të Shqipërisë dhe Bosnjës, shkrimtarë të njohur si Zija Çela, Anrila Spahija; kritikë letrarë si Agim Baçi; personalitete të botës akademike shqiptare si prof. Sadik Idrizi, dr. Adijata Ibrishimoviç-Shabiç, akademik Tvrtko Kulenoviç etj.

Vajzat e mjegullës është romani i një dashurie të madhe, ku vërshojnë ndjesitë e dashurive ekzistenciale: dashurisë për jetën, për vendlindjen, për njerëzit, për gjuhën, për zakonet identifikuese, për mitet dhe legjendat ende të gjalla; është një roman i dashurisë për të bukurën në një realitet herë-herë të shëmtuar; i dashurisë për vajzat, lulet dhe këngët e tyre, si edhe i paqtimit me fatin, duke e jetuar atë në çdo frymëmarrje.

Përmes një stili gjuhësor krejt të veçantë dhe të ngjyrosur edhe me elemente të një kulture deri diku jo krejt të njohur, Namik Dokle paraqet situata dhe vende që nxisin thellë përfytyrimin e lexuesit dhe çdo përshkrim fjalësor mbërrin të kthehet në pikturë reale e plot ngjyra.

Formulimet origjinale, humori fjalësor, ironia, si veçori gjuhësore, mbushin shpesh kontrastin mes ankthit të pasigurisë dhe forcës shpirtërore identifikuese.

Besnikëria ndaj gjuhës së gjallë të personazheve reale bëhet shpesh edhe forma e vetme e kundërshtisë së hapur ndaj zhargonit të pabesë të diktaturës. Goranët dhe Gora, përmes këtij rrëfimi grishës nga faqja e parë deri tek e fundit, vijnë te lexuesi përmes një simboli të fortë, që prek në mënyrë sa poetike, aq edhe tragjike sferën e vetëdijes mbi misterin dhe atë çka përcillet si e njohur e pakundërshtueshme.