Presidenti Nishani uron besimtarët myslimanë me rastin e Ramazanit

nishani_1465143720-9044197

Presidenti i Republikës, Bujar Nishani uroi besimtarët myslimanë shqiptarë me rastin e fillimit të muajit të Ramazanit. Në deklaratën e bërë ditën e dielë, më 5 qershor, Nishani vlerësoi rëndësinë e Ramazanit në islam dhe uroi besimtarët për më shumë dashuri dhe përkujdesje për njëri-tjetrin.

Më poshtë po publikojmë urimin e plotë të presidentit Nishani:

“Të dashur besimtarë myslimanë shqiptarë si dhe të gjithë ju që respektoni dhe e praktikoni besimin mysliman!

Sonte nis për të gjithë Ju periudha e sakrificës dhe e reflektimit, e vetëpastrimit shpirtëror dhe e devotshmërisë ndaj të Plotfuqishmit: Muaji i shenjtë i Ramazanit. E nesërmja shënon për të gjithë Ju një ditë sa të veçantë shpirtërisht, aq edhe të vështirë fizikisht.

Me këtë rast dëshiroj t’u uroj përzemërsisht dhe me sinqeritet të thellë fillimin e mbarë të kësaj feste kurorëzuese të besimit tuaj të palëkundur!

Ky muaj i shenjtë dhe i pakrahasueshëm shënon sakrificën më sublime njerëzore ndaj besimit të palëkundur për Krijuesin, për ligjet e patjetërsueshme dhe rregullat hyjnore, të cilat kthjellojnë shpirtrat e përkushtuar dhe pastrojnë e qetësojnë mendjet e trazuara të besimtarëve myslimanë në mbarë botën, duke i bërë edhe më të vetëdijshëm për mrekullinë e besimit dhe rëndësinë e vlerave të tij.

Sakrifica e Ramazanit është festa fetare, por njëkohësisht edhe guri i provës së besimit të njerëzve ndaj besëlidhjes së tyre me Zotin e Plotfuqishëm, që e tregojmë dhe e vërtetojmë nëpërmjet sakrificave të përditshme e të vullnetshme besnike përgjatë një muaji të tërë.

Le të shërbejë ky muaj i shenjtë për të gjithë Ju besimtarë myslimanë, që të lini mënjanë ndasitë, t’i bëni thirrje ndërgjegjes suaj për të përmbushur më së mirë detyrimet dhe përgjegjësitë njerëzore dhe fetare, për t’iu shmangur veseve dhe dobësive, për t’iu gjendur me më shumë dashuri dhe përkujdesje njëri-tjetrit dhe të afërmve tuaj si dhe për të vënë në piedestal e për t’iu falur vetëm vlerave të vërteta e të pastra njerëzore.

Ju uroj nga zemra një agjërim sa më të lehtë gjatë Muajit të Ramazanit dhe njëkohësisht mendje sa më të kthjellëta e shpirtra sa më të kulluar”, uron Nishani.

Pin It