Agjencia e Trajtimit të Pronave miraton tarifat e reja për aplikimet për kompensimin e pronave. Sipas udhëzimit të ATP-së ish-pronarët duhet të paguajnë deri në 3 mijë lekë të reja për të dorëzuar kërkesën për hapjen e dosjes.
“Agjencia e Trajtimit të Pronave, gjatë procedurave për trajtimin e pronës dhe përfundimin e procesit të kompensimit të pronave, për të gjitha shërbimet e ofruara prej saj, zbaton tarifat nga 1003.000 lekë”, thuhet në udhëzimin e Agjencisë së Trajtimit të Pronave.
Tarifat
Të gjithë ata që duan të kompensohen për pronat e tyre duhet të paguajnë tarifa për çdo etapë të procesit. Për paraqitjen e kërkesës dhe hapjen e dosjes së re të njohjes dhe kompensimit do të paguhen 3000 lekë, ndërsa kur të dorëzohet kërkesa për kompensim do të paguhen 2 mijë lekë.
Tarifa për dorëzimin e kërkesës për kompensim në vlerë për pasuritë e paluajtshme, pronë private, që preken nga ndërtime informale, është 2000 lekë. Për kërkesat për tjetërsimin e sipërfaqes oborr në përdorim tarifa është 3000 lekë, ndërkohë që për kërkesat për lëshim kopjeje dokumentacioni të administruar nga Agjencia e Trajtimit të Pronave duhen paguar nga 100 – 3000 lekë.
Tarifat që do paguajnë ish-pronarët:
- a) për paraqitjen e kërkesës dhe hapjen e dosjes së re të njohjes dhe kompensimit 3000
- b) kërkesë për kompensim 2000
- c) kërkesë për kompensim në vlerë për pasuritë e paluajtshme, pronë private, që preken nga ndërtime informale 2000
- d) kërkesë për tjetërsimin e sipërfaqes oborr në përdorim 3000
- e) kërkesë për lëshim kopjeje dokumentacioni të administruar nga Agjencia e Trajtimit të Pronave: deri në 100 fletë-20 lekë/fletë; mbi 100 fletë -3000 lekë.
