Mbyllja e pjesshme e kufijve nga Maqedonia, Kroacia, Serbia, Sllovenia dhe Austria, të cilat u lejojnë kalimin vetëm sirianëve dhe irakianëve, po e zhyt ne kaos Greqinë. Bazuar në faktin se afganët përfaqësojnë rreth 30 përqind të të ardhurve në Greqi, brenda pesë ditësh të gjitha qendra e pritjes në territorin grek do të mbushen me emigrantë. Me mijëra vetë kanë mbetur të bllokuar në kufirin mes shtetit helen dhe Maqedonisë pas nisjes së zbatimit të kufizimeve të dielën.

Organizata e bamirësisë ” Mjekët pa Kufij ” thotë se ka mjekuar me qindra njerëz që pretendojnë të jenë plagosur në përleshjet me policinë maqedonase ­ duke përfshirë këtu dhe kafshime nga qentë. Emigrantët refuzojne të kthehen dhe arsyetimi i tyre është fare i thjeshtë. Në Siri luftohet prej 5 vjetësh, shprehen ata, në Afganistan ka luftë prej më shumë se tre dekadash. ISIS ekziston në Siri por ekziston dhe në Afganistan.

Kryeministri grek paralajmëroi më herët nuk do të lejojë që vendi i tij të shndërrohet në një “depo shpirtërash”. Shumica e vendeve të BE-­së vitin e kaluar votuan në favor të shpërndarjes së 120,000 refugjatëve në të gjithë bllokun. Por disa shtete të Evropës Lindore kanë refuzuar të pranojnë kuotat, ndërsa fluksi i të ardhurve me shumë gjasë do të vazhdojë. Sipas vlerësimeve të brendshme të qeverisë të raportuara në mediat lokale, deri në 2020-­tën Gjermania pret qe të akomodojë rreth 3.6 milion refugjatë.