Të hënën më 11 korrik është afati i fundit për ankimimin e notës nga maturantët, por sipas tyre ky proces nuk është efektiv. Maturantët thonë se rregullorja u njeh atyre të drejtën e ankimimit, por pa rezultat sepse nota gjithsesi nuk mund të ndryshohet.

Kjo do të thotë se edhe nëse ankesa e maturantëve pranë AKP-së rezulton e saktë dhe vlerësimi i testit është bërë gabim, nota mbetet e njëjtë. Sipas maturantëve kjo është veçse një procedurë burokratike, pasi vlerësimi i bërë nga ekspertët e Agjencisë Kombëtare të Provimeve (AKP) nuk ndryshohet.

Nga ana tjetër janë të shumtë maturantët që pretendojnë se provimet e tyre janë vlerësuar gabim.

Ashtu si vitet e kaluara, maturantët që rezultojnë ngelës do të kenë një mundësi të dytë për t’u ritestuar në fund të muajit gusht. Ndërsa aplikimet për universitete pritet të fillojnë pas datës 20 korrik.